സൗദി അരാംകോയ്ക്ക് കൂടുതല്‍ പണം വേണം: സള്‍ഫർ ബിസിനസ് ഓഹരികള്‍ വില്‍ക്കും; ലക്ഷ്യം 700 കോടി ഡോളർ

റിയാദ്: ആഗോള വിപണിയിൽ ഡിമാൻഡ് കുതിച്ചുയരുന്ന സാഹചര്യത്തിൽ തങ്ങളുടെ സൾഫർ ബിസിനസിന്റെ ഓഹരികൾ വിൽക്കാൻ തീരുമാനിച്ച് സൗദി അറേബ്യൻ പൊതുമേഖലാ എണ്ണക്കമ്പനിയായ അരാംകോ. ഈ ആസ്തി വിൽപ്പനയിലൂടെ 700 കോടി ഡോളർ (ഏകദേശം 7 ബില്യൺ ഡോളർ) സമാഹരിക്കാനാണ് കമ്പനി ലക്ഷ്യമിടുന്നതെന്ന് അന്താരാഷ്ട്ര വാർത്താ ഏജൻസിയായ റോയിട്ടേഴ്‌സ് റിപ്പോർട്ട് ചെയ്യുന്നു.

അരാംകോയുടെ ആകെ ഇൻഫ്രാസ്ട്രക്ചർ ആസ്തികളുടെ മൂല്യം 5,000 കോടി ഡോളറോളം വരുമെന്നാണ് വിപണി വിദഗ്ധർ വിലയിരുത്തുന്നത്. പശ്ചിമേഷ്യൻ യുദ്ധത്തെ തുടർന്ന് ആഗോള വിപണിയിൽ സൾഫറിന്റെ വിതരണത്തിൽ വൻ തടസ്സങ്ങൾ നേരിട്ടിരുന്നു. വിവിധ വ്യവസായങ്ങൾക്ക് അത്യാവശ്യമായ ഈ അസംസ്‌കൃത വസ്തുവിന് നിലവിൽ അന്താരാഷ്ട്ര വിപണിയിൽ വൻ ഡിമാൻഡാണുള്ളത്.

കഴിഞ്ഞ രണ്ട് വർഷമായി എണ്ണവിലയിലുണ്ടായ ഇടിവ് മൂലമുണ്ടായ സാമ്പത്തിക പ്രതിസന്ധി മറികടക്കാൻ അരാംകോ തങ്ങളുടെ ഇൻഫ്രാസ്ട്രക്ചർ ഹോൾഡിംഗുകളുടെ ഓഹരികൾ വിറ്റഴിച്ച് പണം സമാഹരിച്ചു വരികയാണ്. ഈ വർഷം ആദ്യം പശ്ചിമേഷ്യൻ യുദ്ധത്തെ തുടർന്ന് എണ്ണവില താൽക്കാലികമായി ഉയർന്നത് കമ്പനിയുടെ വരുമാനം വർധിപ്പിച്ചിരുന്നെങ്കിലും, അമേരിക്കയും ഇറാനും തമ്മിൽ പ്രാഥമിക സമാധാന കരാറിൽ ഒപ്പുവെച്ചതോടെ എണ്ണവില വീണ്ടും താഴേക്ക് പോയി.

സൗദി അറേബ്യയുടെ ബജറ്റ് വരുമാനത്തിന്റെ ഏറ്റവും വലിയ സ്രോതസ്സും ഗവൺമെന്റിന്റെ വൻകിട വികസന പദ്ധതികളുടെ പ്രധാന ഫണ്ടിങ് പങ്കാളിയുമാണ് അരാംകോ. സൗദി ഗവൺമെന്റിന്റെ വിപുലമായ പദ്ധതികൾ കാരണം ബജറ്റ് സന്തുലിതാവസ്ഥയിൽ എത്തിക്കണമെങ്കിൽ എണ്ണവില ബാരലിന് 90 ഡോളറിന് മുകളിൽ നിൽക്കേണ്ട സാഹചര്യമുണ്ട്. എന്നാൽ അരാംകോയുടെ പരമ്പരാഗത എണ്ണപ്പാടങ്ങളിൽ ഉത്പാദനച്ചെലവ് ലോകത്തിൽ തന്നെ ഏറ്റവും കുറഞ്ഞ നിരക്കിലാണ്.

ഇതിനുപുറമേ, കിഴക്കൻ പ്രവിശ്യയിലെ ധഹ്രാൻ ക്യാമ്പ് റെസിഡൻഷ്യൽ കമ്മ്യൂണിറ്റി ഉൾപ്പെടെയുള്ള തങ്ങളുടെ റിയൽ എസ്റ്റേറ്റ് വിഭാഗത്തിലെ ആസ്തികൾ വിറ്റഴിച്ച് 1,000 കോടി ഡോളർ വരെ സമാഹരിക്കാൻ അരാംകോ ലക്ഷ്യമിടുന്നതായി ഈ വർഷം ആദ്യം റിപ്പോർട്ടുകൾ വന്നിരുന്നു. കഴിഞ്ഞ വർഷം ബ്ലാക്ക്‌റോക്കിന്റെ (BlackRock) നേതൃത്വത്തിലുള്ള നിക്ഷേപകരുടെ കൂട്ടായ്മയുമായി 1,100 കോടി ഡോളറിന്റെ വൻകിട കരാറിലും അരാംകോ ഒപ്പുവെച്ചിരുന്നു. സൗദിയിലെ 10,000 കോടി ഡോളർ ചെലവ് വരുന്ന ജാഫുറ (Jafurah) ഗ്യാസ് പ്രോജക്റ്റിലെ മിഡ്‌സ്ട്രീം സൗകര്യങ്ങൾ ലീസിന് നൽകുന്നതായിരുന്നു ഈ കരാർ.

സൗദി അറേബ്യയിലെ ഇത്തരത്തിലുള്ള ആദ്യത്തെ വൻകിട അൺകൺവെൻഷണൽ ഗ്യാസ് പദ്ധതിയാണിത്. ഈ കരാർ പ്രകാരം നിക്ഷേപക ഗ്രൂപ്പ് ഈ സൗകര്യങ്ങൾ 20 വർഷത്തെ കാലാവധിക്ക് അരാംകോയ്ക്ക് തന്നെ തിരികെ ലീസിന് നൽകും. വരും വർഷങ്ങളിൽ കൂടുതൽ ആസ്തികൾ വിറ്റഴിച്ചുകൊണ്ട് ധനസമാഹരണം നടത്താനാണ് സൗദി അരാംകോയുടെ പദ്ധതി.

Content Highlights: Saudi Aramco is reportedly planning to sell a stake in its sulfur business to raise up to $7 billion. The proposed share sale is part of the company's broader strategy to strengthen its finances, optimize its asset portfolio, and secure additional capital while maintaining its leadership in the global energy industry.